الدارجة المغربية : كيفاش نخدم إعلان ممول على الفيسبوك ؟ شنو هي الطريقة اللي نقدر نصاوب إعلان ممول ناجح ؟
حتى واحد منا ما تينكر قوة الفيسبوك فالوصول لأكبر عدد من الناس و أكبر عدد من الكليان فوقت وجيز.. غير تيبقى المشكل أو العائق الكبير، ونتمنى إن شاء الله بعدما تقرا هاد المقال، ما يبقاش عندك هاد المشكل، هو أنه متنقدروش نصوبو إعلان ممول.. أو كاين اللي تيظن بأن الإعلان الممول على فيسبوك خاص تكون شي شركة أو شي وكالة إعلانية باش تقدر تصوبو.. لكن فالحقيقة راه أي واحد يقدر يصوب إعلان ممول على الفيسبوك، شريطة تتبع بعض الأساسيات اللي تضمن لينا نجاح الإعلان الممول..وهادشي اللي غادي نتعرفو عليه من خلال هاد المقال و مقالات قادمة إن شاء الله...
أولا غادي نشرح ليكم أسهل وسيلة للقيام بحملة إعلانية على الفيسبوك يعني فيسبوك أدس.. وهو أول نوع تيقدمُ لينا فيسبوك باش نروْجو للصفحات أو للمواقع أو لبيع الخدمات أو المنتجات.. Boost Post
أسهل طريقة دير بيها حملة إعلانية مدفوعةـ بحيث تدير بوسط منشور على الصفحة ديالك وتروج ليه باش يوصل نسبة أكبر من الناس، وتتقدر ديرها من خلال الضغط على Boost Post أو Promouvoir الموجود فى أسفل البوسط اللي بغيتي تروج ليه على الصفحة، أو لو انت كنت الأدمين ديال الصفحة فبطبيعة الحال الفيسبوك يطلعلك "Notification" وتيقولك دير إعلان لشي بوسط عندك فالصفحة بناءاً على احصائيات ومعايير ديال السيسطام ديال فيسبوك وكذلك على أساس أنه كاينين صفحات مشابهة دارت الإعلان لمثل هاد البوسط اللي عندك...
فهاد الطريقة عندنا 3 أنواع من إستهداف الجمهور ... إما فانز الصفحة بوحدهم ، أو فانز الصفحة و لائحة أصدقائهم ، أو استهداف الجمهور على حسب المنطقة الجغرافية... الأعمار... الجنس (ذكور أو إناث أو كليهما) ... الاهتمامات...
امتى تنستخدمو هاد الطريقة، هاد الطريقة جدا فعالة لنشر البوسط و ضمان وصوله لشريحة مهمة جدا من الجمهور و المتابعين بهدف Awareness - Engagement ، خاصة إلا كانت الميزانية على قد الحال ، و بصراحة راه تيحقق نتائج ممتازة تتبان ليك فى عدد المتابعين و المهتمين بالصفحة... اللي تيتزاد بشكل سريع...
شنو تيقتارحو علينا كهدف من هاد الطريقة ؟ عادة وفالغالب تيكون الـ Engagement مثلا (Likes, Comments, Shares)، بمعنى حصد المزيد من التفاعل اللايك التعاليق والبارطاج..
لكن مؤخرا كاينة واحد الميزة جديدة اضافة هدف الـ Messaging يعني إرسال رسالة خاصة، يعني المِسنجر أو الواتساب،
الا درتي فالبوسط زر "Send Message، وبغيتي من خلالو تجمع مشتركين فالمسنجر تستطيع تراسلهم مباشرة من خلال الصفحة ديالك،
وكاين هدف Website Visits إذا كان البوسط يحتوي على رابط موقعك الإلكتروني، إلا بغيتي زيارات للموقع ديالك..
ما يعاب على هاد الطريقة، هي قلة المميزات دياولها، عكس ما يوفره الـ Ads Manager سواء في الاستهداف، الميزانية، والتقارير التحليلية والشكل ديال الإعلان ديالك... وهذا اللي يخليني ندويو على الطريقة الثانية باش دير حملة إعلانية مدفوعة أو ممولة على الفيسبوك.. الطريقة الأكثر احترافية Ads Manager ، اللي تيخدمو بيها خبراء الماركتينغ و الويب ديزاين Ads Manager : أو البلاطفورم الرسمية للإعلان على فيسبوك تندخلوا ليها من هنا
هادي ماشي بحال Boost Post هنا الإمكانيات غير محدودة تتبدا من إنشاء محتوى الإعلان حتى الاستهداف والميزانية والتقارير التحليلية للأداء، ولكن ردوا البال هادشي تيتطلب معرفة جيدة لأدوات الإعلان فالفيسبوك ضروري ما تدرب على هاد الأدوات وذلك بمتابعة إحدى الدورات التدريبية ديال الناس الخبراء فالمجال، ونصيحتي ليكم قلبو على دورات لمدربين معتمدين من طرف فيسبوك، أي اللي دوزو وتيدوزو الدورات التدريبية اللي تديرها شركة فيسبوك... أو أي شركة معتمدة من طرف فيسبوك...
المهم... على عكس الـ Boost Post فــ Ads Manager توفر ليك بزاف الطرق وتيعطيك تفاصيل كثيرة لإستهداف الجمهورمثل (لغة الجمهور المستهدف – سلوك الجمهور المستهدف – علاقة الجمهورالمستهدف بالصفحة أو الإيفنت)،هذا بالإضافة للـ Custom Audiences وLookalike Audiences.
تتعدد الأهداف للقيام بحملة إعلانية على منصة فيسبوك حسب اش بغينا و لاش بغينا نوصلو مثلا :
- App installs
- Traffic
- Event Responses
- Lead Generation
- Conversion
من المميزات اللي تتيحها المنصة، واللي هي مميزات إضافية متاحة في الـ Ads Manager وغير متاحة فى الـ Boost Post، تنلقاو بالمجمل:
- انشاء محتوى إعلانى بعدة أشكال متميزة اللي متنقدروش نديروها من خلال واجهة صفحة الفيسبوك.
- استهداف قوي وفعال أكثر من الـ Boost Post.
- إنشاء Dark Post بوسط تيوصل للجمهور المستهدف كإعلان لكن ما تيبانش عندنا فالصفحة نهائيا.
- عمل Schedule للإعلان تتصوب إعلان وتتخليه مقاد مصوب.. باش تأكتيفيه فى الوقت اللي بغيتي أنت.
- اختيار كيفاش وفين غادي يبان الإعلان بالظبط سواء على الفيسبوك أو الإنستجرام، سواء على الكمبيوتر أو السمارتفون، وحتى أشمن نوع من السمارتفون..
- تحديد أجزاء دقيقة فى طريقة صرف الميزانية، وتحديد ساعات معينة يعمل فيها الإعلان خلال اليوم.
- مشاهدة تقرير تفصيلى عن أداء الإعلان الخاص بك.
امتى تنستخدمو هاد النوع من الإعلانات عادة ما تنخدمو بهذ الطريقة إذا كان الهدف من الإعلان هو تحقيق ربح للنشاط التجاري ديالناـ موقع إيكوميرس، بوتيك، خدمات، شركات... أو بغيتي زيارات لموقعك أو الرفع من عدد مرات التحميل لتطبيق موبايل أو زيادة المشتركين فى قائمتك البريدية، أو جلب مشاهدات حقيقية للفيديوهات ديالوك على اليوتيوب... هاد النوع من الإعلانات على الفيسبوك تديروه إلا عندنا ميزانية متوسطة أو كبيرة.. يعني بغينا نخسرو على الأدس ديالنا...
خلاصة:
السؤال المحير دابا هو شنو اللي أحسن؟ واش الطريقة الأولى ولا الطريقة الثانية؟
خويا على حساب الهدف ديالك من الإعلان وشحال موجد ليه ديال الفلوس تقدر تختار إنا وحدة فيهم. عندك فيديو تعريفي للشركة ديالك وتيبين الخدمات اللي تتقدم، وبغيتيه يوصل إلى شريحة أكبر من الجمهور باش تعرف رد فعلهم وتفاعلهم معاك، فنصحك بــ Boost Post هى الأفضل والأسرع وغادي توفر الوقت. أما إذا كان الهدف ديالك هو كسب عدد كبير من الزيارات لموقعك الإلكتروني أو الا بغيتي تعرف معلومات أكثر وبيانات للمُهتمين بالمنتج ديالك أو شي خدمة تتقدمها، فنقول ليك الـ Ads Manager هو الأفضل حيت غادي يعاونك تربح عملاء جدد.. وغادي يعطيك رأي الناس فالمنتجات ديالك يعني الحاجة المزيانة فالخدمة أو المنتج ديالك وشنو الحاجة الخايبة فيه باش تخدم عليها من بعد وتقدم المنتج أو الخدمة بشكل أحسن وأكثر استجابة للسوق ولتطلعات الزبناء..
إلى عندك أي استفسار أو تساؤل.. مرحبا بك.. خلي لي تعليق و نجاوبك فأقرب فرصة.. شكرا على المتابعة ديالك و موعدنا فالمقالات القادمة إن شاء الله
ليست هناك تعليقات:
إرسال تعليق
إضافة تعليق :
لن يتم إظهار أو نشر أو مشاركة إيميلكم..